KILIG! Mga estorya sang pagpalangga kon Valentines Day

Ni Anna Lorraine Pinet

MALAPIT na ang Valentines Day, ika-14 sang Pebrero. Gina-dedikar gid ini nga adlaw sa pagpabutyag sang pagpalangga sa mga espesyal nga tawo sa aton kabuhi.
Lima ka estudyante sang Central Philippine University ang nagsugid sang mga makakilig nga natabu sang Valentines Day.

“Nag-text ang akon kahigugma nga si Dominic agud manyapon kami sa Jollibee. Sang umpisa, nakabatyag ako sang kakulba apang sang nag-upod na kami, tuman gid ako kalipay labi na sang nag-umpisa na kami sang order sang pagkaon. Pagkatapos sadto, nagtamyawanay kami sang “Happy Hearts Day”. Dayon, nagsiling sia sa akon sang, “Thank God, I found you.””

- Emily Jane Taleon, BSED-3

“Memorable ang akon Valentines Day sang upod kami sang akon abyan apisar sia maglakat sa Manila. Wala gid ako naglaum nga halukan nya ako sa agtang kag tamyawon nga “Happy Valentines Bestfriend”. Dayon, ginhatagan nya ako sang tatlo ka rosas kag Valentine card nga ginatagu ko tubtub subong.”

- Aillen Sevillena, BED-2

“Sang gab-i bag-o mag Valentines Day, gin-sorpresa ako sang akon kahigugma kag sia nagkanta sang “Closer You and I”. Sang adlaw na sang Valentines, nagkitaay kami sa Gaisano, Roxas Boulevard kag ginhatagan nya ako sang isa ka kulintas. Dugang pa gid, nagtan-aw kami sang sunset kag pagkatapos, ginpakilala ko sia sa akon pamilya.”

- Andrea Gabion, BSN-3

“Gintagaan ako sang akon abyan sang isa ka matahum kag maduagon nga Valentines card kag gin-libre nya ako sa SM City Iloilo. Nagtan-aw kami sang sine. Nagab-ihan gid kami sang pauli kay nasadyahan gid kami.”

- Cyn Divine Amosin, BSBABM-1

“Ang tagpangaluyag ko nanawag kag ginpabati ako sang paborito ko nga ambahanon, “Right Here Waiting”. Sang Valentines Day na, nakabaton ako sang CD sang Calla Lily halin sa iya. Nagkadto kami sa dagat. Naga-ulan sadto nga tion kag ginpatokar nya liwat ang nasambit nga ambahanon. Isa man sa indi ko malipatan amo nga nakabaton ako sang stuffed toy halin kay Rein nga iya ginpadala paagi sa LBC.”

- Debbie Jo R. Roquero, BSN-4