Tito Nobleza, dapat ipabugal

NI GEMMA LULU VILLLALON

SI Tito Paris Nobleza, kilala indi lang diri sa Siudad sang Iloilo kundi pati
na sang Manila ang nagpauli diri sa Iloilo para sa iya one-man homecoming
exhibit sang nagligad nga Nobiembre 21 sa Amigo Plaza Mall.
Si Nobleza ang ginbun-ag sa banwa sang Cairohan, Bingawan, Iloilo kag ginboto
sia sang apat ka beses bilang Artist of the Year nga ginhatag sang Iloilo
High School sang sia nagabutho sadto.
Pareho sa iban nga artist, ang iya tinuig sang sia ara sa buluthuan
ginpatuhoy niya sa mga drawing para sa mga proyekto niya sa buluthuan. Bangud
sa indi matago nga talento nga ginaangkon ni Nobleza, na-notice sang iya
manunudlo ini kag sa ulihi, sia na ang nagahimo sang pila ka school artworks
requirements sang ila buluthuan.
Bangud sang iya paghimakas, nagbutang sia sang portrait shop sa Sheraton
Hotel. Nakapatib-ong ini sa iya bilang isa ka artist bangud kalabanan sang
mga negosyante, artista, kag politiko na gustuhan ang iya obra mestra kag
istilo sa pagpinta.
Nakaangkon sia sang kahigayunan nga magpinta sang dagway sang mga presidente
sang Pilipinas parehas nanday Joseph Estrada, Cory Aquino, Fidel ramos, kag
Gloria Macapagal Arroyo kag mga negosyante parehas nanday Henry Sy, John
Gokongwei, Lucio Tan kag madamu pa.
Tungod sini, nakabakal sia sang balay kag dota kag napaeskwela niya ang iya
mga kabataan.
Sa subong nagalab-ot na sa 22 ka exhibits ang iya napasakupan luwas sa
one-man show nga ginpakigbahin niya sa sini lang.
Sa iya one-man show, nakaangkon sang kahigayunan ang mga tumalambong nga
masaksihan ang iya ka katandos sa pagpinta bangud may pila ka tawo ang
nakaangkon sang oportunidad nga makabahin sa on the stop sketching. May duha ka tawo nga nangin kabahin sang amo nga exhibit, isa na diri si Vice
Mayor Jed Patrick Mabilog kag family portrait nanday Atty. Leo Sombiro.
Dapat gid mapabugal si Nobleza bangud nangin finalist man sia sa nagligad nga
GSIS Painting Competition.

Magaabot Ang Kaagahon, Laura!

Nobelita Ni Ric T. Grozen

(Ika-8 Nga Gua)

MATAHUM ang hardin, ginapalibotan ini sang pader kag nanarisari ang mga
kabulakan kasubong man sang nagkalainlain nga mga rare plants. Si Tyu Vincio
ang nagaatipan sini. Kag sa adlaw-adlaw niya nga paghikot kag pagkapisan,
labi pa gid niya ini ginpatahum.
Sa isa ka idas, una nga ginpapuswitan ni Laura ang mga matahum nga American
Rose. Ti, siempre dalalagku ang mga bulak kag may nagkalainlain pa nga mga
duag. Wala ginapatup-an sang tubig ang nagabunloskad kag daw nagayuhom nga
mga sinipad. Nanamian gid sia sa pagtulotan-aw, samtang padayon ang
pagpuswit. Dayon naman sa isa ka idas ang mga sunflower. Huo, daw nagailigpat
ang bulawanon sini nga duag nga kasubong sang isa ka platitto ang kadakuon.
Dayon ang mga daisy, manubo nga tanom nga may duag orange ang mga ini.
Dayon ang mga chrysanthemum, duag silvery gold man ini daw kasubong tasa ang
kadakuon kag sa unhan ang mga lirio nga may duag crimson- red. Sa pangiliran
sang pader ara man nagakabod ang mga bougainvilla nga may puti kag duag rosas
nga mga bulak. Sa pihak ang mga nagapasayangsayang nga mga yellow bells.
Daw nakabatyag sing kakapoy si Laura. Ginpatay niya ang gripo. Dayon nagkutol
sang duag rosas nga Rose. Naglingkod sa malaba kag semento nga bangko. Gintamdan ang Rose, ginsulusanggi sa guya kag magtikab. "Oh Rose, I know you
are winking at me but you speak toward heaven and God."
Ginpamangkot ang Rose. "Is it true that you speak a word that even babies may
understand?" Naglisu, padayon ang paghugakom sang masalapay ang tunok. "Ah,
you're not a Rose without thorns." Ano gani ang mapanugyan sa isa ka lalaki
nga indi makapabutyag sa hinigugma? "Ah, say it with flowers."
Ti, ang buot silingon hatagan mo ang hinigugma sang bulak. Nadumdoman ang
ginhambal ni Apostles Matthew "Consider the flowers in the field, how they
grow, they toil not, nor they spin." Ang buot silingon ang mga bulak sa
latagon wala sing nagatatap sa ila, pero sila nagakabuhi paagi sa indi makita
nga kamot sang Dios. Nakatayhum si Laura, nakatangla sa langit kag nakatikab
sang pagpasalamat sa iya maayo nga pagkahimtang.
Kag madasig nga nagkalaipu ang mga dahon sa pungango sang panahon. Nag-abot
ang tion nga nagbatyag na sang pagsakit si Laura. Gilayon sia ginpatigayon ni
Misis Melba nga gindaala sa ospital. Sa ila nga pagsampot dayon sia
ginpahigda sa hiligdaan nga may kariton kag ginadalidali pasulod sa delivery
room. Diri ginpalibotan sia sang doctor kag mga nurses.
Kagat-bibig ang pagpasakit ni Laura, tubtob iya ginbun-ag ang isa ka mapagros
nga lapsag nga lalaki. Kag nadulaan sing animo si Laura kag sang masag-ulian
sing animo kaatubang na niya si Misis Melba. "Lalaki ang anak mo, Laura!'
pulong niya nga nagayuhom.
"A-Ang akon anak, sa diin na?" ang iya may kabalaka nga natuaw.
"Magpakatawhay ka Laura, ato sia didto sa Nursery Room. Pabay-i lang kay
ipakuha ko, agod imo matan-aw."
Kag pila pa ka tion kaiping na ni Laura ang iya anak. Nahakos niya ini nga
nagatulo ang iya luha.
"O, indi ka magpatulo sang luha, magkalipay ka kay may anghel ka na.""Anak ko sia sa pagkasala Misis," pasapayan niya nga natikab.
"You look at the bright side of the world. Don't think that he is the
unwanted baby. Everything in this world is through God's will. So, love your
baby, accept him as a gift of God to you," laygay niya nga dala ang
paglugpay.
"S-Salamat sa imo pagpasanag sang akon kaisipan, Misis," natuaw niya nga
ginkugos liwat ang lapsag.
Kag sang makagwa na sa ospital, nasampotan ni Laura nga ang iya hulot
gin-areglo na sing maayo. May hiligdaan nga adjustable, puede mapasaka ang
bahin nga gina-unlan. May magamay nga coffee table sa iya iping kag may tray
sang mga prutas sa kaiping sang coffee table.
"Misis, gin-areglo mo gid sing maayo ang akon hulot?" pasikto niya nga
nahayanghag nga ginapalibot ang panulok. Bag-o nga duag, lavender nga mga
kurtina, small study table with lampshade kag kona nga ginapalibotan sang mga
kilingkiling.
"Para sa imo kasulhayan kag sang imo baby, Laura."
Nahakos niya si Misis. "Indi ko mahibal-an kon paano ako makabalos sa inyo
nga kayo, Misis," ang iya natuaw nga nagalumawlomaw ang mga mata.
"Sige na magpahoway ka na, ari si Shirly ang imo mangin-kaupod diri sa hulot
kag manginmanoglibang sang imo baby."
"Madamo gid nga salamat, Misis." Ang iya ntuaw nga ginpasiplatan ang
nagayuhom, 16 anyos nga si Shirly.
Nagtalikod si Misis Melba, nagadalidali ini kay ma-opisina pa. Kag sa atubang
sang pamahaw magkaatubang sila sang iya bana. "Ka-guapo sang anak ni Laura,
Rufo," pulong niya nga gintinidor ang steak.
"Huo Melba, maputi, tiluong ang ilong kag mapagros nga lapsag," tuaw man niya
nga nagahigupigop sang kape, sa iya plato ang fried egg kag steak man.
"Naumol-umol ako sa bata. Daw gusto ko ini kuguson pirme."
"Namag-ohan ka lang sa bata nga ina. Basi pila lang ka adlaw madulaan ka na
sang gana sa iya," tayhum niya.
"Ambot lang Rufo," kag nag-undang na si Melba, nagpamahid sang baba. Nagderetso sa pagpanipilyo kag matiuntion handa na sia nga maglakat.
Nag-kiss sa iya bana kag magpaalam.
Samtang si Shirly, kugos ang bata may ginmuno kay Laura nga nagapungkuon
malapit sa bintana. "Manang Laura, wala ka pa bala ginagutom?"
Ginhikaphikap ni Laura ang iya tiyan. Nagakalam na ini, patimaan nga gutom na
sia.
"Ano bala ang gusto mo kaunon?" ang may kabalaka niya nga napakiana.Matiuntion nagsulod si Tya Purita. "Laura, mag-inom ka sang gatas, ini ang
tugon sa akon ni Misis nga paimnon ka kada aga," pulong niya nga may dala nga
tray nga may baso sang gatas kag loaf bread.
Nagtulok si Laura. "Ibutang lang dira, Tya Purita," pulong niya nga mahilom
nga maluya pa sia.
Ginbutang matuod ang trat sa coffee table. "Imnon mo, samtang mainit pa, agod
mamgpulopagsik ka."
"Huo. Salamat."
Kag nagtalikod sia, mabatian pa ang paglagpok sang ganhaan.
Ginbutang ni Shirly ang lapsag sa kona. Ginkuha ang baso sang gatas nga
natungtong sa platito kag gindahu. "Sige na, Manang Laura."
Gindahu. "Mabinalak-on ka man katulad ni Tya Purita?" tayhum niya.
"Amo man ina ang tugon sa akon ni Misis nga magluas sa paglibang sa bata,
tatapon ka man," tayhum man niya.
Napinsar ni Laura ginapa-spoil gid sia ni Misis, ala-senyorita ang iya dating
diri.
Alas dies sa aga, nagbangon si Laura matapos makapiyongpiyong. Nagpungko kag
magkinamkinam sang ubas. Matiuntion ara si Shirly. "Gusto mo panitan ko ang
isa ka red apple?"
"Sige."
Sa adlaw nga Sabado kag Domingo ara si Misis sa hulot ni Laura. "Kamusta na
ang imo pamatyag?" pamangkot niya sa nagahulohigda nga si Laura.
"Nagpulopagsik na, pero indi pa gid tanto," pulong niya nga naglingkod sa
kama.
Dayon ginkuha ang lapsag sa kama.Nag-atubang. "Magkaon ka sang mga ginapadala
ko sa imo nga pagkaon diri, agod madali ka magpagsik."
"Huo Misis."
Naglibotlibot si Misis nga ginaulit-ulit ang lapsag.
Ginapasiplatans sia ni Laura nga nalipay man sa pagtan-aw sa pagkahulog sang
buot sini sa lapsag.
"Laura, puede bala nga hulamon ko anay si baby, didto lang sia anay sa akon
hulot?"
"Sige."
Amo ini sa masunson ang nagakatabu. Nahulog matuod ang buot ni Misis sa bata.
Sa kaayo nga pagtratar sa iya, nagakadapat lamang nga malipayon man si Laura
nga makita nga malipayon man si Misis. Kag iya gin-atubang si Shirly. "Pila
kamo nga mag-ulotod?"
"Pito kami, Manang. Ako ang agot."
"Ti, nakatapak ka na sa high school?"
"Second year lang Manang, pahoway lang anay, ginapatapos pa ang duha ko ka
magulang," ang pulong niya nga wala nagatulok kay Laura, nasuboan kay gusto
gid tani magpadayon.
"Ti, kon makatapos na ang imo duha ka magulang."
"Maayo gid man nga makatapos sang high school."
Napinsar ni Laura bisan kabulig lang may handom man nga makatapos. Sia,
nagpakapag-on bala agod nga makatapos? Wala gid, nagina-ulipon sia sang
gugma. Naglungolunngo. May maayo pa ayhan nga kapalaran nga magaabot sa iya?
Ayhan tubtob na lamang sia sa pag-atipan sa iya anak. Nakapanghayhay sia.Makaligad ang pila ka semana nagpulopagsik na si Laura, gani kasubong sang
una didto naman sia sa kusina. "O Laura, ari ka na naman? Mapulopagsik ka na
bala?" pakiaana ni Tya Purita nga nahakos man si Laura.
Naghakos man si Laura sa iya. "Mapulopagsik na gawa ako," pulong niya nga
dayon naghikot sang iya mabulig.
"Ngaa indi mo na lang pag-atipanon ang imo anak?"
"Ara man si Shirly."
Makadali sila nga naghipos kag nagdurop sa ila mga ginahikot. Pila pa ka tion
naglisu si Tya Purita. " Ti Laura, mapauli ka bala sa inyo kon lubos ka na
nga magpagsik?"
"Huo, gid lang, e." Sing makadali nga nagdulog sia. Napinsar nga ang bata amo
ang iya manginpanaming, agod nga kon makita ini sang iya amay, mahimu nga
mapatawad sia.
"Ti kundi, magmanginmasubo si Misis kay nagalangot na sa bata?"
"Pabay-i lang kay magabalik man ako diri kon magmaayo na ang akon amay sa
akon."
Hapon, kugoskugos gid ni Misis ang bata ni Laura, nagsulod si Doktor. "Daw
bata na lang ang imo ginapatungdan, a?" pakiana niya, samtang nga nagailis
nga daw kalapyo.
Ginbalikid sia ni Melba. "Ikaw naman ,o. Daw indi mo nahangpana ng akon
paglangot sa bata. Daw naumol-umol gid ako sa bata," kag dayon nga
ginhalokhalokan kag gindaludalu ang bata. Matiuntion nag-iping sa bana nga
kugos man gihapon ang bata. "Ano ayhan kon aton ayupon ang bata, Rufo?" tulok
niya sing tadlong sa bana.
Nagtadlong ang doctor sa salandigan. "Ikaw lang, huo. Maayo kon magpasugot
sina si Laura."
"Ti, kundi hayluhon naton."
Nagtindog sia kag magpalapit sa bintana, nagpanghulonghulong sa sagwa. "Wala
mo lang mahibal-an nga ang bata amo pa ang ipanaming ni Laura sa iya amay
agod sia mapatawad?"
Nagpanumdom si Misis. Nagtulotimbang. "Kabay pa nga pagapatawaron sia sang
iya amay. Kon indi, kundi madali naton nga mapasugot si Laura nga aton ayupon
ang iya bata?"
"Ginapangamuyo mo pa nga indi sia mapatawad, ti kon mapatawad, ti wala na
sing kahigayonan? Magapamilit ka pa?"
"A, basta indi ako magluat sa paghingyu kay Laura," pangyambi pa niya."Dapat mo panumdumon nga kon mag-ayuhay na si Laura kag ang iya amay, sila
nga lolo kag lola sang bata, napiho ko nga indi magpasugot," malig-on niya
nga nasambit.
"Ikaw Rufo, ginakontra mo gid ako," palamug-ot ni Misis.
Makaligad ang isa ka bulan may telegrama nga nabaton si Misis. "Aba, maabot
si Rommel, ang akon anak!" ang iya malipayon nga natuaw. Gani sina nga hapon
sang mag-abot ang iya bana, gilayon niya ini nga ginbalita.
"Maabot si Rommel? Aba, makaligad ang pila man ka tuig makita na naton sia!"
malipayon niya nga natuaw, samtang nagauba sang iya sapatos.
Samtang si Misis sa pagpasiplat ni Rufo padayon man gihapon ang pagkugos sa
lapsag ni Laura. Nagkurinot ang iya agtang, gani nagpalapit ini. "Daw sa bata
na lang ang imo atension, a?"
"Ikaw naman Rufo, pati bata ginapangimonan mo pa? Pabay-i lang kay ipakuha ko
sia kay Shirly kag ikaw naman ang akon atipanon," dayon talikod niya kag tagu
nga nagyuhom.
Matuod, dugaydogay ara na si Shirly kag ginkuha ang bata. "O, ano bala ang
aton pagahambalan nga daw nagakurinot gid ang imo agtang?" tampad ni Melba.
"Husto bala ang akon panagupnop nga nagapangimon ka sa bata?"
"Indi man sa amo sina. Siling ko daw ginabuhos mo gid ang imo tinion sa
bata."
"Kag kulang bala ang akon pag-atipan sa imo, amo bala ina?" Kag napinsar niya
nga kulokarinyuhon ang bana. Gani nagpasabak ini sa iya. "O, ari na ako, ano
pa nga atension ang gusto mo?"
Nahakos na lamang ni Rufo ang asawa kag wala na sia sing natuaw pa.
Matiuntion nagtindog si Misis. "Rufo, si Laura mapagsik na kag kahapon
nagpahibalo na sia sa akon nga sini nga semana mapauli na sia sa ila." Makadali sia nga nagdulog. "Ano bala ang himuon ko, gusto ko tani nga
magpabilin pa sia?"
"Ang isiling mo kay nagalangot ka sa bata?" tampad ni Rufo.
"Daw amo ina, Rufo," masinulub-on niya nga natuaw.
"Tagai anay si Laura sing kahigayonan nga makapangayo sing patawad sa iya mga
ginikanan. Maayo nga bata si Laura, napiho ko nga magabalik sia diri."
(May Kasugpon)

PASKUA

Ni MARIA LUISA D. GIBRALTAR

PILA na lang ka inadlaw kag Paskua na naman. Ang mga anak sang puloy-an
nagaaliwasa na sa pagpaabot sining malipayon nga adlaw sang tuig. Ila
nahibal-an nga sa ila panimalay, ini gid ang masadya nga kahiwatan nga ila
ginasaulog.
Ang Paskua para gid sa mga bata. Sa Luke's gospel, yara gid napatpat ang
christmas story.
"Sa gilayon, pagkatapos mabatian sang mga nagabantay sang hayop gikan sa mga
anghel nga nagpakita sa kalangitan, naglakat sila sa pagpangita sang
Mesiyas." (Lueas 2:15) "Kag ila nakita ang Mahal nga Birhen kag si Jose kag
ang Lapsag-----".
Sa plano sang makakagahom nga Amay, Iya nahibal-an nga si Ginoong Jesus
nagakinahanglan gid sang isa ka iloy kag isa ka amay. Ang ginikanan
kinahanglanon gid kag malahalon agod maatipanan ang Anak sang Dios sa Iya
pagdaku.
Kag ina man ang kinahanglanon sang tanan nga kabataan sa bug-os nga kalibutan
sa tanan nga panahon - ang amay kag iloy sang isa ka panimalay. Agod
magpalangga, mag-atipan, magpakaon kag magpadaku sang ila kabataan. Ang tagsa
ka bata nga ginhimo sa imahen sang Ginoo, nagakinahanglan gid sang
pinakamaayo nga pag-atipan sa ila pagdaku. Kag wala sing makahatag sina nga
pag-atipan kundi ang mga ginikanan mismo sang bata ilabi nag id ang iya sini
iloy. Kon ang bata nagdaku sa pagtatap sang iban nga tawo, pareho abi sang
lolo o lola ukon mga tiya kag iban pa nga paryente, makabaton man sia sang
pag-atipan pero iban gid ang pag-atipan nga mahatag sang isa ka iloy.
Ina man ang komparasyon sa bahin sang aton Ginoong Jesus. Sa plano sang
Balaan nga Amay, nalakip ang mahal nga Birhen nga nagaatipan kag nagapalangga
kay Ginoong Jesus samtang nagadaku sia. Kag nadala man sa plano sang Amay si
San Jose nga magatimbang sa pag-inakop sa Niño Jesus.
Ang pagtingob sang panimalay dapat mabatyagan sang tagsa ka katapo sa
adlaw-adlaw nga tanan ilabi nag id kon may mga family gatherings pareho sang
paskua. Mabudlay maghiwat sang isa ka family gathering kon dis-united ang mga
katapo sang panimalay. Halimbawa sa paskua, sariwaol ini nga kahimtangan sa
bahin sang isa ka broken family. Paano ang ila pagsaulog sining pinakamasadya
nga panahon para sa mga bata kon ang ila mga ginikanan wala nagaugyon kag
nagasipakanay sang banas?
Sa paskua, kinahanglan gid nga ang panimalay nagatingob, nagaisa kag
nagatipon para sa ila pagsaulog sang kaadlawan sang Mesiyas. Pero sa
nagbinulagay nga panimalay, ini ang pinakamasubo nga tinion para sa ila.Ang Christmas story nagasugid man sang mahisaon nga hari nga gusto tapuson
ang kabuhi sang wala sarang ikagbatu nga Lapsag. Ang Iya ginikanan nagtinguha
gid sa pag-amlig sa Iya tubtob sa pagdala sa Iya sa liwan nga duog agod
maluwas sia sa paghingabot sadtong sakon nga hari.
Ila ginbayaan ang ila duog, ang ila mga himata, mga abyan kag pangabuhian
para sa kaluwasan sang Lapsag. Nagsakripisyo sila para sa Lapsag nga
gintugyan sa ila sang mahal nga Dios.
Kon ipaanggid sa aton nga may mga kabataan man, kita nalipat nga dapat man
kita magsakripisyo para sa aton mga anak. Nagakabuhi kita indi lang sa aton
kaugalingon kundi ilabi na gid para sa aton mga anak. Nga padakuon sila suno
sa aton katungdanan kag mapahilayo sila sa mga kalautan kag kalisdanan sa
sini nga kalibutan. Nga aton sila padakuon suno sa kagustuhan sang mahal nga
Makaako nga sila magausoy sang tadlong nga banas sang pagpangabuhi sa sini
nga kalibutan.
Sa isa ka puloy-an nga ang ginikanan nagsipakay, ang mga anak sa sini nga
panimalay, amo ang mga buka nga bahin sang puloy-an nga biktima sang nabuong
nga relasyon. Ang matuod gid nga makaluluoy amo ang mga kabataan kag indi ang
amay kag iloy.
Kag sat ion sang paskua nga ang ginikanan nagbulagay, madamo nga mga
pamangkot ang nagatuaw sa balatyagon sang nagahinakit nga kabataan."Sin-o gid bala ang mask o nga palanggaon" Si Nanay bala ukon si Tatay?""Ngaa bala nagbulagay ang amon ginikanan? Wala gid bala sila nagapalangga sa
amon nga ila mga anak?"
"Indi bala nagpalanggaanay sanday Nanay kag Tatay sadto anay? Ina gani kon
ngaa nakaanak sila sa amon nga ila kabataan. Karon ngaa indi na sila makapuyo
upod sa amon nga ila mga anak sa isa lang ka puloy-an?""Indi nag id bala kami makapuyo tanan sa isa lang ka puloy-an? Ilabi na gid
sa sini nga paskua?"
Masinakiton ini nga mga pamangkot ilabi na gid sang may buot na nga mga anak
sang puloy-an, samtang ginapaanggid nila ang panimalay ni Ginoong Hesus nga
may amay kag iloy nga nag-atipan kag nagpalangga sa iya sa sini nga kalibutan
samtang nagadaku sia sa pagtuman sang Iya misyon nga ginhatag sang Dios nga
Amay.
May isa ako ka abyan nga babaye nga may apat ka mga anak. Nagtuad sia sa akon
nga indi sia malipayon sa iya kabuhi tungod ang iya bana may ginapuyo nga
babaye nga iya man sini kaupod sa ila opisina.
"Nagabusong na subong ini nga babaye. Plano sang bana ko nga pauntaton na ini
sa iya trabaho antes mabulgar nag id sa ila talatapan ang imoralidad nga ila
ginabuhat."
"Nahibal-an mo ini tanan?" tuman ang kakibot ko.
"Huo. At least honest ang bana ko sa pagsugid sini sa akon sa baylo nga
magbinutig sia."
"Nakabatas pa sia magsugid sa imo nga may bag-o sia nga babaye nga
ginahigugma?"
Naghibi sing masinakiton ang abyan ko. Nagauyog ang iya mga abaga sa
ginahimunggan nga paghilibion.
"Makaluluoy man ining abyan ko," himulongon ko nga nagapug-ok man ang dughan
sa pagtulok sa iya nga nagakalisod. Mationtion;
"Ti, ano gid ang pamat-od mo?"
"Gusto ko sia bulagan pero nagapakiluoy sia sa akon nga may pagtamod pa sia
sa akon kag palangga gid kuno niya ang mga bata."
"Ang buot silingon nga duha na kamo ang iya ginahigugma?" Mahipos sia nga
nagtango nga nagapamahid sang iya mga luha.
"Pero indi pwede ina. Kinahanglan isa lang sa inyo ang iya pillion. Kag kon
sa pahustohusto lang, ikaw gid ang may mayor sa iya tungod ikaw ang iya
kasado."
"Sugod sang mahibal-an ko ang tanan bahin sa ila sang babaye, nangin-impierno
na sa pamatyag ko ang amon puloy-an. Kag nagangil-ad na ako magtulok sa akon
bana kon magpauli sia sa amon gikan sa iya babaye."
Nagpug-ok man ang dughan ko mamati sining panugiron sang akon abyan."Kon amo sina, ano gid ang pamat-od mo?""Sundon ko ang kagustuhan sang bana ko. Pasugtan ko sia nga padayunon ang
amon pag-upod tungod na lamang sa amon mga anak. Nahibal-an ko gid nga ang
mga anak ko ang grabe nga maapektuhan kon padayunon ko ang akon plano nga
bulagan ko ang ila amay. Tungod sa ila, antuson ko ang tanan agod indi
mabuong ang amon pangabuhi."
Tungod sa mga bata - - - - - .
Ini nga rason ang ginakabitan sang madamo nga mag-asawa nga indi magbulagay
bisan grabe na ang ila palaligban nga duha. Tungod sa mga bata ginaantos sang
madamo nga asawa ang kaluiban sang ila bana. Kag tungod man sa mga bata kon
ngaa may pila ka bana ang nagaantos man sang kaluiban sang ila asawa. Agod
manginbilog ang ila panimalay bisan pa sa grabe nga palaligban nga ginasalom
sang ila panimalay.
Tungod sa mga bata nga naga-idolo sang ila ginikanan kag gusto gid makita ang
ila amay kay iloy nga nagatipon sat ion sang paskua upod sa ila.
Yari pa ang isa ka halimbawa nga hitabo;
Isa sadto ka Sabado sang aga. Upod kami sang bana ko nga nagapungko sa lobby
sa atubang sang clinic sang amon doktor. Schedule namon sadto nga adlaw sa
pagpa-check-up sa amon doktor.
Sa pihak nga clinic nga iya sang isa ka pediatrician, may naggua nga
mag-asawa nga masnahon sa ila guya ang kalipay. Ang asawa nagakugos sang
ayhan duha ka bulan nga anak nga ginaagubay sang malipayon nga bana. Larawan
sila sang kalipay tungod sang nagahigot sa ila pag-upod nga amo ang ila anak.
Nakapautwas ako sang pangamuyo nga unta magpadayon ang ila malipayon nga
pagpuyo tubtob sa ila pagtigulang upod sa ila mga anak.
Nakaginhawa ako sing madalom. Nagbalik sa akon panumduman ang kaso sang akon
abyan. Seguro kon ngaa sia kag ang iya bana kasubong man sadtong lamharon nga
mag-asawa sang bag-o pa lang ang ila pag-upod bilang mag-asawa.
Apang nian diin na sila nga duha pagkaligad sang madamo nga tinuig kag
makaanay sila sang apat?
"Ang lamharon bala nga mag-asawa nga ato sa indi madugay, manginkatu;ad man
sang nagakatabo sa akon abyan kag sa iya nga nakakita sang bag-o nga
pinalangga?"
Sa sini nga paskua, ginapangamuyo gid naton nga ang mga panimalay nga
nagaginamo kag wala nagahangpanay, masanagan man kag makakita sang kalinongan
kag kalipay. Sa nasiling na naton, tungod sa mga bata kag sa ispiritu sang
paskua.
Bulahan ang mga panimalay nga mapag-on nga nagatingob kag nagaupod sa pagpuyo
nga ginasalom ang mga unos sang pagpangabuhi nga wala sila nagakalingkang kag
padayon nga nagapuyo sing tingob kag may kalipay. Bulahan sila nga
nanginmadinalag-on sa tanan nga mga palaligban sang pangabuhi.
Kag bulahan gid ang kabataan sang mga puloy-an nga ginpadaku sila,
gina-atipan kag ginpalangga sang ila ginikanan. Nga ginhimo nila nga modelo
ang pagpadaku, pag-atipan kag pagpalangga ni Santa Maria kag San Jose kay
Ginoong Hesus nga gintugyan sang Dios nga Amay sa ila.
Sa tanan, Merry Christmas!
(KATAPUSAN)